|
Deklaratë mbi raportin
monitorues për zbatimin e ligjit”Për masa kundër dhunës në
marrëdhëniet familjare”
07.12.2009
OBJEKTI I MONITORIMIT: Vendimet e Gjykatës së Shkallës së I-rë,
Tiranë për lëshimin e urdhrave të Mbrojtjes dhe urdhrave të
Menjëhershëm të Mbrojtjes.
PERIUDHA E MONITORIMIT: 30.04.2008-01.06.2009
Qendra dëshiron të nënvizojë disa konkluzione, të nxjerra nga
monitorimi i 448 vendimeve për lëshimin e urdhrave të Mbrojtjes
dhe urdhrave të Menjëhershëm të Mbrojtjes të Gjykatës së
Shkallës së I-rë, Tiranë. Ajo konstaton se, ka vënë re një
përmirësim të vazhdueshëm në gjykimet e Gjykatës së Shkallës së
I-rë, Tiranë, për lëshimin e urdhrave të Mbrojtjes dhe atyre të
Menjëhershëm të Mbrojtjes.
Qendra konstatoi një funksionim të mirë të rrjetit,
polici-gjykatë dhe beson se rritja e dukshme e numrit të
kërkesave përpara gjykatës, veç të tjerave, lidhet edhe me
rritjen e besimit të qytetarëve ndaj profesionalizmit dhe
përkushtimit të këtyre organeve. Këto gjetje bazohen në
vështrimin krahasues me rezultatet e monitorimit të parë të
kryer nga QNL për periudhën 01.07.2007-31.04.2008. Por, Mendojmë
se Gjykata, duhet të analizojë faktin, se përse nga të gjitha
kërkesat e paraqitura, objekt monitorimi, është pushuar gjykimi
në 73.43% të rasteve.
Sugjerojmë që Policia, duhet të forcojë punën, jo vetëm në
drejtim të identifikimit dhe dërgimit në gjykatë të rasteve të
dhunës në familje, por edhe në ekzekutimin e vendimeve gjyqësore
të formës së prerë, në bashkëpunim me Zyrën e Përmbarimit dhe
Prokurorinë. Kërkohet edhe një bashkëpunim më i mirë i saj me
avokatët dhe qendrat që ofrojnë shërbimin ligjor falas.
Mendojmë se, edhe Prokurori duhet ta ushtrojë këtë instrument të
dhënë nga ligji. Nuk konstatuam asnjë kërkesë të adresuar prej
tij, në gjykatë.
Nuk
konstatuam adresime as nga zyrat sociale të organeve vendore:
bashki, minibashki, komuna. Këto zyra, janë më pranë qytetarëve,
prandaj duhet të trajnohen për të zbatuar detyrat e mjetet
ligjore që ligji u ka dhënë.
Së
fundi, deklarojmë fuqimisht, se Ministria e Drejtësisë, duhet të
sigurojë zbatimin e ligjit, “Për ndihmën Ligjore”, i cili ka
hyrë në fuqi nga prilli i këtij viti dhe të garantojë mbrojtjen
ligjore falas të viktimave të dhunës në familje. Kjo
domosdoshmëri buron nga fakti se nga monitorimi rezultoi se
paditësit u përfaqësuan me avokatë vetëm në 37 raste.
Qendra për Nisma Ligjore Qytetare njofton të gjithë personat e
interesuar se ka publikuar raportin monitorues në gjuhën shqipe
dhe angleze, në faqen e saj të internetit
www.qag-al.org. Përgatitja dhe botimi i raportit monitorues
në websitin tonë u mundësua nga Civil Rights Defenders.
|