|
|
Rrjeti Shqiptar
kundër Dhunës me Bazë Gjinore dhe Trafikimit
Rritje e pjesëmarrjes
së gruas në vendimmarrje është bërë imediate. Shqipëria është e
vonuar
08.03.2009
Rrjeti Shqiptar kundër Dhunës me Bazë
Gjinore dhe Trafikimit, në përkujtim të 8 Marsit, Ditës
Ndërkombëtare të Gruas, përshëndet të gjitha ato gra dhe vajza,
si dhe atë pjesë të shoqërisë dhe shtetit shqiptar që punon e
lufton çdo ditë, për të rritur respektin e të drejtave dhe të
dinjitetit të tyre në të gjitha fushat: në familje, në punë, në
arsim, art e krijimtari, si dhe në jetën politike.
Shpresojmë që më tepër se çdo ditë tjetër,
kjo ditë do të shërbejë për të kthyer vëmendjen e shtetit
shqiptar, kah grave që kanë nevojë: atyre që luhaten çdo ditë
midis pabarazisë e varfërisë, përballen me dhunën fizike e
psikologjike brenda familjes; atyre që edhe pse punojnë me
shpirt për të siguruar jetesën në familjet e tyre, nuk kanë
asnjë pasuri për vete, por mbeten përjetë të varura
financiarisht; ndaj grave që rrisin me aq mundime fëmijë të
ngujuar nga plagët e gjakmarrjes, si dhe gjithë atyre që ndeshen
me abuzime primitive e vulgare të të drejtave të tyre. Roli i
tyre në jetën e familjes dhe shoqërisë është i pazëvendësueshëm,
prandaj meriton vetëm respekt dhe, jo paragjykime.
Rrjeti i organizatave kundër dhunës me bazë
gjinore shpreh keqardhjen e thellë për ekzistencën e fenomeneve
të tilla si ai që u demaskua në media ditët e fundit.
Shqetësimet dhe ngacmimet seksuale në marrëdhëniet e punës, në
emër të detyrës e funksionit, janë një nga shfaqjet më të egra
të diskriminimit ndaj gruas. Ato përbëjnë jo vetëm një aspekt të
pabarazisë gjinore, por edhe një cënim të rëndë të dinjitetit
njerëzor të grave e vajzave. Dëshpërimi ynë është më i thellë
po të mbajmë parasysh se, një rast i tillë ndodh pikërisht atje
ku gruaja dhe vajza duhet të gjejnë mbrojtjen dhe mbështetjen më
të mirë.
I gjithë reagimi shoqëror kundër këtij rasti,
pavarësisht nga ngjyrimet politike, ose përkatësia gjinore a
shoqërore, ishte një mësim i mirë për qeveritë dhe të gjitha
institucionet shtetërore, të cilat kanë detyrim, që jo vetëm të
eliminojnë raste të tilla nga gjiri i tyre, por të identifikojnë
dhe të luftojnë këto fenomene kudo që ndodhin, edhe në personat
privatë; të mbështesin denoncimin e tyre, duke mos lejuar
paragjykime dhe fajësime të grave dhe vajzave që bëhen viktima
të kësaj sjelljeje. Është detyrë e institucioneve që të zbatojnë
ligjin ekzistues, por njëkohësisht ta përmirësojnë atë me qëllim
që të parandalojë dhe të godasë më mirë këtë fenomen të shëmtuar
në shoqëri. Natyrisht, shoqëria civile është këtu për të
ndihmuar.
Ne mendojmë që rritja e pjesëmarrjes së gruas
në vendimmarrje është bërë imediate. Shqipëria është e vonuar.
Ëndrrat, dëshirat dhe angazhimet e çdo femre shqiptare, si e çdo
shtetasi të Republikës, ecin me orën evropiane të Shqipërisë.
Ju faleminderit!
Rrjeti Shqiptar kundër Dhunës me Bazë
Gjinore dhe Trafikimit
1. Aleanca
Gjinore për Zhvillim
2. Qendra për
Nisma Ligjore Qytetare
3. Qendra e
Këshilimit për grate e dhunuara
4. Strehëza për
gratë e dhunuara
5. Shoqata e
grave ?refleksione? |
